हेटौंडामा बस दुर्घटना हुँदा ४८ जना घाइते

१५ असार २०८०, शुक्रबार

हेटौंडा – पूर्व पश्चिम राजमार्गअन्तर्गत हेटौँडा उपमहानगरपालिका ११ मा यात्रु बस दुर्घटना हुँदा ४८ जना घाइते भएका छन्।

हेटौंडा उपमहानगरपालिका वडा नम्बर ११ नवलपुरमा ना ६ ख ९८०४ नम्बरको यात्रुबाहक बस दुर्घटना हुँदा ४८ जना घाइते भएको जिल्ला प्रहरी कार्यालय मकवानपुरले जनाएको छ।

शुक्रवार मध्याह्न १२:४० बजे नारायणगढबाट जनकपुर जाँदै गरेको ना ६ ख ९८०४ नम्बरको बस आफैँ अनियन्त्रित भई बाटोबाट करिब सय मिटर तल खसेको थियो। घाइतेहरुको हेटौंडा अस्पातल र चुरेहिल अस्पतालमा उपचार भइरहेको छ।

चुरेहिलमा २० जनाको उपचार भइरहेको छ भने हेटौँडा अस्पतालमा २७ जनाको उपचार भइरहेको छ।

जिल्ला प्रहरी कार्यालय मकवानपुरका अनुसार घाइतेमध्ये एक जनाको अवस्था भने गम्भीर रहेको छ। दुर्घटनाबारे थप विवरण खुल्न बाँकी रहेको प्रहरीको भनाइ छ।