सप्तकोशी किनारमा युवतीहरूबीच कुटपिट, एक पक्राउ ४ जनाको खोजी

१ श्रावण २०८०, सोमबार

सामान्य विषयमा झगडा हुँदा सप्तकोशी किनारमा युवतीहरूबीच कुटाकुट भएको छ।

सुनसरीको बराहाक्षेत्र नगरपालिका-१० मा युवतीहरूबीच कुटपिट भएको भिडिओ सामाजिक सञ्जालमा सार्वजनिक भएको हो।

कुटपिटमा संलग्न रहेको आरोपमा एक जना युवतीलाई प्रहरीले पक्राउ गरेको छ भने अन्य ४ जनाको खोजी गरिरहेको छ।

जिल्ला प्रहरी कार्यालय सुनसरीका अनुसार १९ वर्षीया प्रिति लिम्बुलाई आइतबार राति पक्राउ गरिएको हो।

कुटपिट घटना गत असार २९ गतेको हो। प्रितिसहित ५ जना युवतीको समूहले ३ जना युवतीमाथि कुटपिट गरेका थिए। १९ वर्षीया मनिषा राई, नाम नखुलेको १६ र १७ वर्षीया नाबालिगमाथि कुटपिट भएको हो।

आरोपित लिम्बुमाथि अभद्र व्यवहारको कसुरमा म्याद थप गर्न जिल्ला प्रशासन कार्यालय सुनसरीमा लगिएको छ। कुटपिट गर्ने दुवै पक्षका युवतीहरू एउटै गाउँका रहेको बताइएको छ।