प्रहरीले गोकर्णेश्वरमा चलायो गोली,एक जना घाइते

२५ आश्विन २०८०, बिहीबार

काठमाडौं- प्रहरीले काठमाडौंमा गोली चलाएर लुटेरा समूहलाई नियन्त्रणमा लिएको छ।

काठमाडौंको गोकर्णेश्वर नगरपालिका वडा नम्बर ३ जगडोलमा बिहीबार दिउँसो लुटेरा समूहलाई नियन्त्रणमा लिन प्रहरीले गोली चलाएको हो।

प्रहरीको गोली लागेर एकजना घाइते भएका छन् । लुटेरा समूहले हतियार झिकेपछि आत्मरक्षाका लागि भन्दै प्रहरी टोलीले गोली चलाएको थियो । प्रहरीले लुटेरा समूहमाथि दुई राउण्ड गोली प्रहार गरेको हो।

तीन वटा मोटरसाइकल चढेर लुटेरा समूह आएका थिए। प्रहरीले उनीहरूलाई पिछा गरेको थियो।

प्रहरीको गोली लागेर सिन्धुली कमलामाई नगरपालिका वडा नम्बर २ घर भएका ३६ वर्षीय अमर घलान घाइते छन्। उनको दाहिने खुट्टाको तीघ्रा र घुँडामुनि गोली लागेको प्रहरीले जनाएको छ। उनको जोरपाटीस्थित एनएमसी अस्पतालमा उपचार भइरहेको प्रहरीले जनाएको छ।

सिन्धुपाल्चोक घर भएका ३० वर्षीय जितेन लामा र सर्लाही घर भएका ३६ वर्षका सन्त लामा प्रहरीको नियन्त्रणमै छन्। उनीहरूबाट एउटा पेस्तोल, पाँच राउण्ड गोली र प्रयोग गरिएका मोटरसाइकल बरामद भएको छ। उनीहरूले के लुट्न लागेका थिए भन्ने प्रहरीले खुलाएको छैन।

घटनामा संलग्न रहेका अन्यको खोजी भइरहेको प्रहरीले जनाएको छ।