आज बकर ईद देशभर मनाइँदै

१४ असार २०८०, बिहीबार

काठमाडौं – मुस्लिम धर्मालम्वीहरुको दोस्रो महान् पर्व बकर ईद (इदुल जोहा) आज देशभर मनाइदैछ ।

विहानैदेखि मस्जित पुगेर आफ्नो धर्मनुसार यो पर्वलाई धूमधामका साथ शुभकामना आदानप्रदान गर्दै मनाउन सुरु गरेको छ ।

इदुल फित्र अर्थात् रमजान पर्वको ७०औँ दिनमा बकर ईद मनाउने धार्मिकविधि छ ।

यस अवसरमा काठमाडौंको घण्टाघर स्थित नेपाली जामे मस्जिद, काश्मीरी मस्जिदलगायत देशभरका मस्जिद र इदगाहमा मुस्लिम धर्मावलम्बीको भीड लाग्ने गर्दछ ।

बिहानै स्नान गरी नजिकैको मस्जिद वा इदगाहमा गई सामूहिक नमाज पढ्छन् । नमाज पढिसकेपछि एकापसमा शुभकामना आदान प्रदान गर्ने गरिएको छ ।

इस्लाम धर्मावलम्बीले खसी वा भेंडाको बली दिने र त्यसलाई गरिब, पाहुना र आफ्नै परिवारका सदस्यलाई भाग लगाएर खाने चलन छ।

बकर ईदका अवसरमा सरकारले देशभर सार्वजनिक बिदा दिएको छ।