पोखराका चार विद्यालयहरूको काठमाडौँ विश्वविद्यालयसँगको सहकार्य

१७ भाद्र २०८०, आईतवार

पोखरा- पोखराका चार विद्यालयहरूले शिक्षण गर्ने परम्परामा परिवर्तन आवश्यक छ भन्ने मान्यतामा आधारित रहेर शैक्षिक गुणस्तरका नवीन विधि,अनुसन्धानमूलक,धारणात्मक सिकाइ अनि परियोजनाका माध्यमले सुधारको अपेक्षा गरी काठमाडौँ विश्वविद्यालयसँग गरेको सम्झौताअनुसार पोखरामा स्कुल लिडरलाई दिइने ४८ घण्टाको तालिम तालिम सम्पन्न भएको छ ।

तालिममा पोखराका बाल प्रभात बोर्डिङ,लक्ष्मी आवासीय मा.वि. बालोदय मा.वि, र जुनियर सिटिजन्स एकेडेमीका स्कुल लिडिरहरूको सहभागिता रहेको थियो ।

काठमाडौँ विश्वविद्यालयका प्रोफेसर तथा डिन बालचन्द्र लुइँटेल र सन्दीप ढुङ्गानाले सहजीकरण गर्नुभएको थियो ।

सिकाइलाई प्रभावकारी तथा समय सापेक्ष बनाउनका लागि काठमाडौँ विश्वविद्यालयसँग सहकार्य गरेको बाल प्रभात माविका प्रिन्सिपल डिल्लीराम अर्यालले बताउनुभयो।

उक्त कार्यक्रममा लक्ष्मी आवासीय माविका प्रिन्सिपल विश्व उदिर,बालोदय माविका प्रिन्सिपल टेकनाथ पौडेल र जुनियर सिटिजन्सका प्रिन्सिपल सुन्दर ढकालले पनि कार्यक्रमको उपयोगितामाथि प्रकाश पारेका थिए।

स्कुल लिडिरहरूलाई एकीकृत पाठ्यपुस्तक ढाँचा र त्यसको अध्यापनमा अपनाइने नवीन विधि तथा परियोजनामा केन्द्रित व्यवहारिक अभ्यासको खाकासमेत प्रस्तुत गरिएको थियो।

यस सहकार्यले दक्ष र सक्षम शिक्षक अनि सिपयुक्त विद्यार्थी उत्पादनमा महत्त्वपूर्ण भूमिका रहने सहकार्य गर्ने विद्यालयको अपेक्षा रहेको छ।यसै कार्यक्रममा दुवै संस्थाबिच सम्झौता पत्रमा हस्ताक्षर गरी हस्तान्तरण
गर्ने काम पनि सम्पन्न भएको छ।