सिराहामा विवाहित छोरीको अविवाहित नागरिकता बनाउन खोज्दा बुबा पक्राउ

२० भाद्र २०८०, बुधबार

सिराहा- सिराहामा विवाहित छोरीलाई अविवाहित भनेर नागरिकता बनाउन खोज्ने बुबालाई प्रहरीले पक्राउ गरेको छ । सिराहाको नवराजपुर गाउँपालिका– ३ का अरबिन्दकुमार यादवले २२ वर्षीया छोरी सुनिताकुमारी यादवलाई अविवाहित भनेर नागरिकता बनाउन खोज्दा प्रहरीले पक्राउ गरेको हो ।

जिल्ला प्रशासन कार्यालय सिराहामा विवाहित भए पनि झुटो विवरण पेस गरी छोरीलाई नागरिकता बनाउन खोज्दा जिल्ला प्रशासन कार्यालयको निर्देशनमा प्रहरीले बुबालाई पक्राउ गरेको हो । जिल्ला प्रशासन कार्यालय सिराहाकाअनुसार नागरिकता सनाखतको क्रममा विवाहित भएको पुष्टि भएपछि झुटो विवरणसहित सनाखत गर्ने बुबा अरबिन्दलाई पक्राउ गरिएको बताए ।

विवाहित छोरीलाई अविवाहित नागरिकताको सिफारिस गर्ने वडाध्यक्ष वंशीलाल यादवलाई पपनि नियन्त्रणमा लिइने जिल्ला प्रशासन कार्यालय सिराहाले जनाएको छ । जानाजान विवाहितलाई अविवाहित भनेर सिफारिस गर्ने नवराजपुर गाउँपालिका– ३ का वडाध्यक्ष यादवलाई नियन्त्रणमा लिएको बताइएको छ।यस विषयमा थप छानबिन गर्नुपर्ने भएकाले वडाध्यक्षलाई पनि झिकाउने निर्देशन प्रजिअबाट प्राप्त भएको प्रहरीले बताएको छ।